Tri projekte infrastrukturore janë dëmtuar financiarisht nga vjedhja e dy milionë eurove nga Thesari Shtetëror.
Bëhet fjalë për rrugët Prishtinë-Mitrovicë, Zhur-Dragash-Brod dhe Prizren-Prevallë, paratë e të cilave janë bartur jashtëligjshëm në llogarinë e kompanisë “LDA Group”.
Këto dëme, u konfirmuan sot në konferencën për media të ministrit të Infrastrukturës, Arban Abrashi dhe sekretarit të tij, Izedin Bytyqi. Këta të dy sqaruan se nuk kanë qenë në dijeni për transferin e jashtëligjshëm. Mirëpo thanë se posa e kanë vërejtur, kanë kërkuar hetime.
“Sekretari e ka pranuar informatën me datë 19 dhe menjëherë ka lajmëruar në Thesar”, tha Abrashi.
Sekretari Bytyqi bëri publike edhe komunikimet e brendshme me Policinë dhe Ministrinë e Financave, në të cilën shfaqen dyshimet lidhur me transferet që janë bërë pa autorizim zyrtar.