Kryeshefi ekzekutiv i ndërmarrjes “Trepça”, Hysen Vrajolli, ka thënë që pandemia ka pasë një ndikim të madh për të keq, në industrinë e rëndë.
“COVID- 19 e ka qit përtoke, industrinë e rëndë, sidomos industrinë e metaleve. Është bërë një çrregullim total në tregun ndërkombëtar të metaleve, sidomos në metalet e Trepçës e cila për një kohë ka qenë trefish, çmimet më të ulëta se vitin e kaluar”.
Kryeshefi i Trepçës, ka dhënë detaje lidhur me bllokimin e xhirollogarive.
“Është e vërtetë, që llogaria jonë bankare është bllokuar prej të premtes së kaluar. Është borxh i vogël prej 800 euro, pritet që nesër të zhbllokohet kjo llogari. Kjo nuk do të thotë që në të ardhmen, nuk do t’i kemi llogaritë e bllokuara për shkak se jemi në borxhe që kemi trashëguar për vite me radhë”.
Vrajolli në Info Magazine, ka thënë që përkundër periudhës së pandemisë, pagat e punëtorëve të Trepçës janë dhënë me kohë.”
“Edhe pse në kohë të COVID-19, ne kemi punuar, përkundër që nuk ka mundësi me e mbajt distancën miniatorët në minierë, ndërsa edhe prodhimi është për 28.34 % më lartë”.
“Gjatë kësaj periudhe, i kemi dhënë pagat me rregull dhe i kemi shlyer 2.5 milionë euro borxhe. Ka qenë maksimumi jonë që kemi mundur ta bëjmë. Këtë muaj do të kemi vështirësi nëse qeveria e Kosovës nuk na ndihmon”.
Ai ka përmendur edhe takimin që kanë realizuar sot me kryeministrin e Kosovës, Avdullah Hoti dhe ministrin e Ekonomisë dhe Ambientit, Blerim Kuçin.
“Jemi marrë vesh që në fillim të javës së ardhshme të takohemi për të diskutuar për modalitetet që si të dalim nga kjo situatë”
