Për nder të Ditës Ndërkombëtare të Vajzave, kryeministri Albin Kurti, ka thënë se në këtë ditë, duhet të sigurohemi që vajzat në Kosovë gëzojnë përfitimet e revolucionit teknologjik që ka ndryshuar jetën e njerëzimit.
Ai ka thënë se për 1 mijë euro në vit do të ofrojmë mbështetje financiare për 1 mijë vajza studente në fushat e STEM në Kosovë.
“E drejta e vajzave për arsimim, veçanërisht në fushat e shkencës, teknologjisë, inxhinierisë dhe matematikës, është e panegociueshme”, ka shkruar Kurti në Facebook.
Postimi në Facebook:
Këtë vit bota po shënon Ditën Ndërkombëtare të Vajzave me sloganin “Brezi digjital, brezi ynë".
Ne duhet të sigurohemi që vajzat në Kosovë gëzojnë përfitimet e revolucionit teknologjik që ka ndryshuar jetën e njerëzimit.
Progresi teknologjik dhe mbarëshoqëror është i lidhur ngushtë me dijen. E drejta për t’u shkolluar është universale dhe duhet t’u garantohet të gjithëve pa dallim. Prandaj edhe kemi marrë vendimin që arsimi i lartë në Kosovë në nivelet Bachelor dhe Master të jetë falas.
E drejta e vajzave për arsimim, veçanërisht në fushat e shkencës, teknologjisë, inxhinierisë dhe matematikës, është e panegociueshme.
Nëpërmjet 1000 bursave studentore do të ofrojmë mbështetje financiare për 1000 vajza studente në fushat e STEM në Kosovë. Të drejtë aplikimi do të kenë të gjitha studentet e rregullta të fushave STEM në vitin akademik 2021-2022 në nivelin bachelor.
Më shumë detaje rreth thirrjes mund të gjenden në faqen e MAShTI.
Le ta mbështesim potencialin e larmishëm dhe të pakufishëm të secilës vajzë.
Gëzuar Dita Ndërkombëtare e Vajzave!
#IDG2021