Vizita në SHBA, Mehaj dhe gjeneral Rama marrin pjesë në ekspozitën “AUSA 2021”

Aktuale

Vizita në SHBA, Mehaj dhe gjeneral Rama marrin pjesë në ekspozitën “AUSA 2021”

Më: 12 tetor 2021 Në ora: 17:30
Foto ilustrim

Në kuadër të vizitës në SHBA, ministri i Mbrojtjes, Armend Mehaj i shoqëruar me komandantin e FSK-së, gjenerallejtënant Rrahman Rama dhe pjesëtarët e tjerë të delegacionit, kanë marrë pjesë në ceremoninë e hapjes së Ekspozitës Vjetore të Shoqatës së Ushtrisë së Shteteve të Bashkuara – “AUSA 2021”.

Ministri Mehaj dhe gjeneral Rama, të cilët janë të ftuar zyrtarisht nga presidenti i AUSA-së, gjeneral Carter F. Ham, patën mundësinë të njihen me produktet e ekspozitës ushtarake dhe shumë prezantime të tjera të zhvillimit profesional, të ofruara nga liderë ushtarakë të Ushtrisë Amerikane dhe të Departamentin Amerikan të Mbrojtjes.

Në po të njëjtën ditë, ministri Mehaj dhe gjeneral Rama nderuan dhe përkujtuan me respektin më të lartë, të gjithë ushtarakët amerikanë –dëshmorë të lirisë dhe paqes kudo në botë.

Pas nderimit me kurorë lulesh pranë Varrit të Ushtarit të Panjohur në Varrezat Kombëtare në Arlington, ata vizituan edhe Muzeun e Kompleksit Memorial, ku ministri Mehaj dhuroi një replikë të helmetës iliro-dardane.

Kjo helmetë u vendos në vend të rëndësishëm të Muzeut, si simbol i mirënjohjes, nderit dhe respektit të përjetshëm të kombit tonë për SHBA-në, kombin amerikan dhe ushtarët e saj.

Ministri Mehaj së bashku me gjeneral Ramën, takuan drejtoreshën e Agjencisë së Bashkëpunimit të Sigurisë së Mbrojtjes të Departamentit të Mbrojtjes së SHBA-së, Heidi Grant.

Ministri Mehaj dhe Grant u pajtuan se bashkëpunimi midis SHBA-së dhe Kosovës udhëhiqet nga vlera dhe interesa të përbashkëta, andaj theksuan se do të intensifikojnë edhe më shumë angazhimet në mënyrë që të përmbushen qëllimet e përbashkëta të mbrojtjes.

Gjatë ditës së dytë të ekspozitës “AUSA 2021”, ministri Mehaj takoi edhe gjeneralin amerikan në pension Randal Dragon, drejtor i Kompanisë Këshilluese të Agjencitë Federale Civile dhe të Mbrojtjes (LMI), me të cilin diskutuan për prokurimin dhe blerjet ushtarake, si dhe shkëmbyen eksperiencat e ndërsjella lidhur me këto çështje.

Më të lexuarat
Sot mund të lexoni Shfletoni kopertinat