Marrëdhëniet mes Malit të Zi dhe Kosovës janë miqësore, të bazuara në parimet e fqinjësisë së mirë dhe perspektivës së përbashkët evropiane.
Kështu ka thënë presidenti i Malit të Zi, Jakov Milatoviq, gjatë një takimi që ka zhvilluar me ambasadoren e Kosovës në Podgoricë, Ariana Zherka-Hoxha.
Në këtë takim, Milatoviq tha se është theksuar rëndësia e raporteve ekonomike, “në veçanti në fushën tregtisë, turizmit dhe energjetikës”.
“Në këtë kuptim, rindërtimi dhe ndërtimi i rrugëve Rozhajë-Pejë dhe Plavë-Deçan janë të një rëndësie të veçantë”, ka thënë Milatoviq në një postim në Twitter.
Në fund, ai tha se Mali i Zi mbështet dialogun mes Kosovës dhe Serbisë, të ndërmjetësuar nga BE-ja.
