Kryetari i Partisë për Veprim Demokratik, Riza Halimi, ka thënë se nuk e ka të qartë se çfarë ka parasysh presidenti i Republikës së Kosovës, Hashim Thaçi, kur ka folur për ‘bashkimin e Luginës së Preshevës’, dhe sipas tij një gjë e tillë është shumë e pa shpjegueshme.
Sipas tij kjo çështje nuk ka kuptim nëse nuk vendoset për diskutim në Kuvendin e Kosovës.
“Nuk e kam të qartë se pse presidenti Hashim Thaçi po flet vazhdimisht për bashkimin e Luginës së Preshevës me Kosovën, sepse është shumë e pa qartë. Natyrisht e gjithë kjo do të kishte kuptim nëse debatohet në Kuvendin e Republikës së Kosovës dhe atje shpjegohet gjithçka”, ka thënë Riza Halimi raporton ‘Danas’
Halimi ka thënë se i gjithë ky debat bie në ujë, pas deklarimeve të presidentit Aleksandër Vuçiq që një opsion i tillë nuk është më në agjendë.
Riza Halimi ka qenë deputet në Kuvendin e Serbisë për disa vite dhe gjithashtu ka qenë edhe kryetar i Kuvendit Komunal të Preshevës.
