(E plotësuar) - Tërë ditën shiu nuk u ndal. Edhe qielli iu bashkua dhimbjes së familjes së Ilir Konushevcit, prindërve, bashkëshortes, vajzës së vetme Nertilës dhe familjarëve tjerë.
Eshtrat e heroit po kthehen në Prishtinë pas 20 vitesh të rënies. Ai ka rënë dëshmor në majin e vitit 1998 në Tropojë teksa me dëshmorin Hazir Mala po ktheheshin për në Kosovë për të sjellë armët për djemtë e Ushtrisë Çlirimtare të Kosovës. Ilir Konushevci ka qenë arteria kryesore e furnizimit me armë për ushtrinë çlirimtare.
Pas 20 vitesh u vendos që trupi i tij të kthehet në atdhe në prag të festës kombëtare 28 Nëntorit.
Bashkë me Hazir Malën, mjekun nga Tropoja ata sot janë rivarrosur në varrezat e dëshmorëve në lagjen Velani, pranë dëshmorëve tjerë.
Fillimisht u bënë homazhe në hollin e Kuvendit të Kosovës dhe më pas u mbajt një akademi përkujtimore.
Pas akademisë kortezhi me trupat e dy heronjve nën përcjelljen e forcave të FSK-së u nis drejt vendit ku përjetësisht do të prehen trupat e tyre.
Për të rënët u shkrepën edhe të shtëna nderi nga garda e FSK-së ndërsa flamujt kuq e zi me të cilin ishin mbuluar arkivolet iu dorëzuan familjarëve.
Ilir Konushevci, bashkëluftëtar i Zahir Pajazitit, Adrian Krasniqit, e shumë heronjve tjerë u kthye nga vendi ku kishte nisur rrugën e lirisë. Në Prishtinë.
Ilir Konushevci dhe Hazir Malaj rivarrosen në varrezat e Dëshmorëve
Me ceremoni të lartë shtetërore është bërë rivarrimi i dëshmorëve Ilir Konushevci dhe Hazir Malaj në varrezat e dëshmorëve në Velani.
Të pranishëm në këtë ceremoni ishin kryeministri i Kosovës, Ramush Haradinaj, nën patronatin e të cilit është bërë edhe rivarrimi, kryetari i Prishtinës, Shpend Ahmeti, ministri i FSK-së, Rrustem Berisha.
Në ceremoni morën pjesë familjarë te të dy dëshmorëve, qytetarë të shumtë. Eshtrat e dy heronjve janë rivarrosur 20 vjet pas vrasjes së tyre, dhe deri tani eshtrat e tyre kanë pushuar në Tropojë të Shqipërisë. Gjatë ditës së sotme në Kuvendin e Kosovës janë bërë homazhe, si dhe është mbajtur një akademi përkujtimore.