Kryetari i Kuvendit të Kosovës, Kadri Veseli, në kuadër të vizitës në SHBA, është takuar sot me kryetaren e Dhomës së Përfaqësuesve të Parlamentit të Iowa-s, Linda Upmeyer, me të cilën bisedoi për partneritetin mes dy shteteve në shumë fusha.
Veseli tha se bashkëpunimi në fushën e sigurisë, bujqësisë dhe arsimit ka qenë deri më tani tejet i frytshëm. Në këtë drejtim, ai shprehu interesimin që të ketë bashkëpunim mes të dy parlamenteve. Ndërsa kryetarja Upmeyer vlerësoi bashkëpunimin mes Kosovës dhe Iowa-s dhe shfaqi gatishmërinë e saj që të thellohet ky bashkëpunim.
Kryetari Veseli ka takuar edhe sekretarin për Bujqësi të Iowa-s, Mike Naig me të cilin ka biseduar për bashkëpunimin e deritanishëm që të dy shtetet kanë pasur në fushën e bujqësisë.
Veseli falënderoi sekretarin Naig për mbështetjen qe autoritetet e Iowa-s i kanë dhënë bujqësisë në Kosovë përmes sjelljes së ekspertëve të ndryshëm për të ndihmuar në rritjen e prodhimit bujqësor në Kosovë. Ai theksoi se bashkëpunimi midis dy të vendeve, në fushën e bujqësisë, duhet të vazhdojë.
Nga ana e tij, sekretari Naig vlerësoi partneritetin e deritanishëm mes Kosovës dhe Iowa-s dhe shprehu gatishmërinë që mbështetja për bujqësinë në Kosovë të rritet.
Kryeparlamentari Veseli ka takuar edhe zëvendëssekretarin e Shtetit të Iowa-s, Michael Ross, si dhe senatorë të ndryshëm të këtij shteti. Po ashtu, kreu i Kuvendit u prit në një takim të veçantë edhe nga kryeprokurori i Iowa-s, Tom Miller.
Në këto takime është biseduar për partneritetin midis dy vendeve, duke theksuar interesimin që të ketë edhe më shumë programe që forcojnë lidhjet midis dy vendeve, në veçanti projekte që kanë të bëjnë me programe të ndryshme studimi për të rinjtë nga Kosova, si dhe hapa të tjerë që ndihmojnë avancimin e komunave të Kosovës në qeverisjen lokale.
Kryetari Veseli do të ketë sot takime edhe në Gardën Kombëtare të Iowa-s, si dhe institucione të tjera akademike dhe ekonomike. Vizitën e tij në SHBA, Veseli do ta vazhdojë edhe në Uashington dhe Nju Jork.
