Të shtunën (sot) ka përfunduar Kampi Nacional i Federatës së Basketbollit të Kosovës (FBK). Kampi filloi më 4 Korrik dhe u organizua në palestrën “Don Bosko” për vajzat dhe djemtë U14, derisa është udhëhequr Arben Krasniqi, Drejtor Teknik në FBK.
Kampi është mbajtur në kuadër të programit të FIBA Europe për Zhvillim të Gjeneratave të Reja (Youth Development Fund/YDF). Federata e Basketbollit e Kosovës është pjesë e projektit të përbashkët të FIBA Europe Youth Development Fund tash e pesë vite së bashku me Federatën e Turqisë (udhëheqëse e projektit), Rumanisë, Bullgarisë dhe Maqedonisë së Veriut.
Koordinatori i Kampit, Arben Krasniqi, ka folur për rrjedhën nga dita e parë deri në fund. “Kemi angazhuar trajnerë të mirënjohur në këtë kamp, që kanë punuar pandërprerë. Lojtarët/et kanë pasur mundësinë të mësojnë nga trajnerët e njohur. Ka qenë një javë shumë intensive me shumë punë. Kemi parë lojtarë e lojtare të talentuara, që do të jenë e ardhmja e Kosovës”, është shprehur Krasniqi për faqen zyrtare të FBK-së.
Drejtori i Përfaqësueseve të Kosovës, Granit Rugova ka thënë se ky kamp është shumë i mirëpritur. “Kemi parë shumë fëmijë të talentuar që në një të ardhme do të jenë pjesë e Përfaqësueseve të Kosovës, e të cilët më vonë mund të jenë pjesë e Kosovës A. Këto kampe ndihmojnë shumë në zhvillimin e talenteve dhe përzgjedhjen e tyre”, theksoi Rugova.
Trajneri Fikret Shatri falënderoi lojtarët/et për angazhimin e tyre dhe disiplinën e treguar në këtë kamp. “Në emër të trajnerëve dhe timin personal ju përgëzoj për punën e mirë që e keni bërë në këtë kamp. Mos e harroni asnjëherë çka keni mësuar në këtë kamp dhe të punoni e mësoni në tërë jetën. Është e rëndësishme të mësoni në shkollë, shtëpi dhe të mos ndaheni nga sporti i basketbollit”, deklaroi Shatri para fëmijëve.
Njëra nga trajneret ishte Kimete Haliti. “Gjatë këtyre ditëve jemi munduar që t’i mësojmë sa më shumë fëmijët të luajnë basketboll. Është e rëndësishme që ata/ato të jenë të edukuar dhe të duan sportin e basketbollit. Këto kampe ndihmojnë shumë në zhvillimin e basketbollit të Kosovës”, nënvizoi Haliti për faqen e FBK-së.
Fëmijët e këtij kampi ishin kandidatë potencialë për të qenë pjesë e Qendrës Nacionale të Basketbollit të cilën FBK planifikon ta hapë në shtator të këtij viti.
