Peja ka shënuar fitoren e pestë në pesë ndeshje në Prince Caffe Superligë.
Pejanët kanë mundur Istogun me rezultat 84:69 (21:12, 25:17, 19:19, 19:21).
Shtatë minutat e parë të ndeshjes ishin të barabartë, por më pas verdhezinjtë ishin më të mirë, duke e fituar çerekun e parë 21:12.
Pejanët nuk u ndalën as në periudhën e dytë për të shtuar më shumë epërsinë, për të shkuar në pushim me rezultat 46:29.
Periudha e tretë ishte tërësisht e barabartë 19:19, ndërsa në atë të fundit istogasit vetëm ngushtuan shifrat, por pa arritur përmbysjen dhe Peja fitoi 84:69.
Te vendasit u dalluan Beck Terwell me 26 pikë e 12 kërcime, John Chandler me 12 pikë, pesë kërcime e gjashtë asistime dhe Jacob Calloway me 18 pikë e gjashtë kërcime, ndërsa te mysafirët më të mirët ishin Tyrese Prince me 14 pikë e tetë kërcime dhe Matthew Lang me 18 pikë e gjashtë kërcime.
Peja është e vetmja në elitë me pesë fitore në pesë ndeshje, ndërsa Istogu numëron një fitore dhe katër humbje.
