Komiteti Ekzekutiv i FIBA Europe mbajti një mbledhje urgjente sot dhe vendosi që ndeshjet si vendase të skuadrave izraelite në Europe Cup mund të zhvillohen në Qipro.
“Pas shqyrtimit të kujdesshëm dhe bazuar në garancitë e dhëna nga Qeveria e Qipros, të mbështetur nga Federata e Basketbollit të Qipros, Komiteti Ekzekutiv pranoi propozimin e Federatës së Basketbollit të Izraelit (IBBA) për Bnei Ofek Dist Herzliya, Hapoel Galil Elion, Ironi Ness Ziona për të luajtur ndeshjet e tyre të FIBA Europe Cup në Qipro sipas kushteve të dhëna nga autoritetet lokale.
Vendimi është rezultat i përpjekjeve të vazhdueshme të FIBA Europe dhe IBBA, ku e para dha disa shtyrje afatesh për të akomoduar përpjekjet e IBBA dhe klubeve të saj për të gjetur një vend të përshtatshëm neutral për të luajtur ndeshjet e tyre në shtëpi”, thuhet mes tjerash në njoftimin e lëshuar nga FIBA Europe.
Kujtojmë se ekipi nga Superliga e Kosovës, Trepça, që po merr pjesë për herë të parë në këtë garë, është në grup bashkë me Hapoel Galil Elion.
Madje, ndeshja e parë mes “Xehetarëve” dhe skuadrës izraelite ishte e paraparë të zhvillohej më 18 tetor, por që nuk u zhvillua shkaku i situatës së krijuar në Izrael.
Kjo ndeshje ishte e vlefshme për xhiron e parë në Grupin G. Trepça zhvilloi këtë të mërkurë ndeshjen e parë në këtë grup, ndaj ZZ Leiden, ndeshje kjo e vlefshme për xhiron e dytë.
FIBA Europe njoftoi gjithashtu se po punon që të caktojë sa më parë datat e reja për ndeshjet e shtyra, ku përfshihen skuadrat izraelite.
“Ndeshjet e planifikuara fillimisht midis 30 tetorit dhe 3 nëntorit janë planifikuar të vazhdojnë sipas orarit fillestar, në varësi të kushteve të vendosura nga autoritetet qipriote që po plotësohen, FIBA Europe po punon gjithashtu në mënyrë aktive për të ri-caktuar ndeshjet që u shtynë nga xhirot 1 dhe 2 sa më shpejt të jetë e mundur”, thuhet në njoftimin e ditës së sotme.
Komiteti Ekzekutiv i FIBA Europe vendosi gjithashtu sot që përfundimisht të anulojë ndeshjet e klubit izraelit në konkurrencën e vajzave, Elitzur Landco Ramla në EuroCup Women, për shkak të mungesës së propozimit që ndeshjet në shtëpi të këtij klubi të luhen në një vend neutral dhe mungesës së marrëveshjes me klubet kundërshtare.
