Historiani dhe njëri prej ideologëve të projektit të ri serbomadh Aleksandar Rakoviq ka zbuluar në një tryezë të rrumbullakët që mblodhi të djathtën serbe, por edhe përfaqësuesit e pushtetit në Beograd, strategjinë e re të "botës serbe" ndaj Malit të Zi, e cila parashikon që serbët të bëhen një shumicë relative në regjistrim, i cili është planifikuar për vitin e ardhshëm.
Por, jo vetëm për Malin e Zi, sepse pastaj thotë se çështja e bashkimit të "të gjitha shteteve serbe në Ballkanin Perëndimor" ngrihet si një iniciativë legjitime.
- Regjistrimi i popullsisë është me rëndësi thelbësore për serbët, jo vetëm në Malin e Zi, por për të gjithë serbët. Identiteti serb po kthehet përmes derës së madhe, dhe ajo që është thelbësore është roli i Serbisë dhe i Republikës Serbe. Kemi çdo të drejtë të përfshihemi në çështjen e regjistrimit në Mal të Zi, kjoa lejohet sipas Kushtetutës së Serbisë - tha Rakoviq sipas "Pobjeda"-s. i cili beson se tani kanë mundësinë të marrin pjesë në zgjidhjen e çështjes serbe në Malin e Zi përmes regjistrimit të ardhshëm.
Rakoviq thotë se "vlerësimi aktual i popullsisë tashmë është në favor të serbëve", prandaj regjistrimi nuk duhet të shtyhet, siç kërkohet nga OJQ-të në Malin e Zi.
- Si serbë deklarohen 36 përqind e tyre, ndërsa ata që kanë zgjodhur gjuhën serbe si gjuhë amtare janë afër 60 përqind. Pres që serbët do të bëhen shumicë relative në Malin e Zi dhe se do të ketë mbi 40 përqind të atyre që deklarohen si serbë dhe se shtetësia serbe e Malit të Zi do të ripërtëritet - ka thënë Rakoviq.
"...E kemi futur idenë kombëtare serbe në rrjedhën kryesore, në politikën e Malit të Zi dhe bashkimi nuk mund të jetë një temë tabu. Kjo është një ide krejtësisht legjitime dhe ligjore. Bashkimi i të gjitha shteteve serbe në ish-RSFJ është një ide krejtësisht ligjore - thotë Rakoviq, i cili gjithashtu citoi analistin kroat Domzet Losh se "procesi i bashkimit serb ka filluar".
- Do të realizohet trekëndëshi i botës serbe Banjalluka - Podgoricë - Beograd - përsëriti Rakoviq.
