Policia gjermane ka zbuluar një nga faqet e internetit më të mëdha në botë për pornografinë e fëmijëve me më shumë se 400,000 përdorues dhe arrestoi katër persona të lidhur me platformën, thanë të hënën prokurorët.
Sipas mediave të huaja, platforma “BOYSTOWN” ka ekzistuar që prej të paktën qershorit të vitit 2019 dhe ishte e arritshme vetëm përmes të ashtuquajturit Darknet, thanë në një deklaratë zyra e prokurorit publik në Frankfurt dhe Policia Federale e BKA.
Uebfaqja ka më shumë se 400,000 përdorues dhe u përdor për shkëmbimin botëror të pornografisë së fëmijëve.
Ajo u mundësoi anëtarëve të marrin përmbajtjen e pornografisë së fëmijëve dhe të shkëmbejnë pamje me njëri-tjetrin në zonat e bisedës, si dhe përmes kanaleve zanore.
“Midis imazheve dhe regjistrimeve video të ndara ishin edhe regjistrimet e abuzimit seksual më të rëndë të fëmijëve të vegjël”, kanë thënë prokurorët.
Policia arrestoi tre të dyshuar kryesorë, të cilët akuzohen për operimin dhe mirëmbajtjen e platformës, gjatë bastisjeve në shtatë prona në mes të prillit.
Të dyshuarit janë një 40-vjeçar që jeton në Paderborn në Gjermaninë perëndimore, një 49-vjeçar nga zona e Mynihut dhe një 58-vjeçar nga Gjermania veriore që jeton në Amerikën e Jugut për disa vjet, tha policia.
Një burrë i katërt, një 64-vjeçar nga Hamburgu, gjithashtu është arrestuar nën dyshimin se ishte regjistruar si anëtar i platformës në korrik të vitit 2019 dhe kishte postuar mbi 3,500 “kontribute” në këtë faqe, duke e bërë atë një nga përdoruesit më aktivë.
Pas bastisjeve, platforma BOYSTOWN është bllokuar, tha policia.
