Që kur Aleksandër Vuçiç ka ardhur në pushtet në Serbi, ka qenë e zakonshme që fjalimet e tij për publikun, të cilat ai thotë se do të shpallë “lajme të rëndësishme”, të mbahen në orët e mbrëmjes. Fjalimi i fundit i tillë u mbajt të martën, shkruan gazeta serbe “Danas”, referuar fjalimit ku u tha se tema kryesore ishte organizimi i “EXPO 2027” në Beograd. Megjithatë, sigurisht Vuçiç devijoi dhe në fjalim u fol edhe për një letër të 56 deputetëve të huaj dhe një artikull në gazetën gjermane “Spiegel” me titull “Kukulla nga Beogradi”, duke iu referuar Vuçiçit. Ata diskutuan gjithashtu inflacionin dhe zgjedhjet në Beograd.
Megjithatë, duket se Vuçiç, me “idhull” presidentin rus, Vladimir Putin mjeshtrin e propagandës, duket se ka përvetësuar më së mirit teknikat e tij.Të pyetur pse fjalimet e presidentit mbahen më së shumti në mbrëmje, ekspertët thonë se kjo është para së gjithash për shkak se atëherë para ekraneve janë numri më i madh i qytetarëve, por edhe sepse atëherë deklaratat e tij mund të transmetohen në emisionet qendrore informative.
Strategjia e Vuçiç
Bojan Klaçarm drejtor ekzekutiv i Qendrës për Zgjedhje të Lira dhe Demokraci (CESID), thotë se thelbi i të gjitha paraqitjeve në media është që mesazhi të arrijë “target-grupin” e dëshiruar. Drejtori i CESID ka listuar disa arsye pse Vuçiç vendos të flasë në mbrëmje. “Para së gjithash, është "prime time". Në atë kohë, njerëzit janë zakonisht në shtëpi, në dhomën e ndenjes, duke parë televizor. Përveç kësaj, materialet nga konferencat për shtyp përfundojnë në transmetimet qendrore të lajmeve ose mund të transmetohen drejtpërdrejt. “Mesazhi shumëfishohet sepse njerëzit përdorin rrjetet dhe shikojnë TV në të njëjtën kohë”, shpjegoi ai.
Gazetari i televizionit Nova S, Zeljko Veljkoviç, i cili i ndjek shpesh fjalimet e presidentit, thotë se ato mund të ndodhin kur të dojë Vuçiç. Ai pohon se nëse do të ndodhin në orën 18:00, siç kanë ndodhur, atëherë qëllimi është që të transmetohen në të gjitha edicionet qendrore të lajmeve. “Presidenti paraqitet si një institucion i gjithëfuqishëm, si një forcë e papritur që shfaqet papritur dhe zgjidh mosmarrëveshjen. Prandaj nuk kemi nevojë për asnjë institucion tjetër. Ai institucion i vetëm mund të shfaqet kur të dojë sepse nuk ka orar pune, as nuk fle si të tjerët”, thotë gazetari. Veljkoviç shton se ajo që presidenti dëshiron që të gjithë të dëgjojnë nuk është ajo për të cilën ai flet më gjatë në fjalimin e tij, sepse të martën ai foli më gjatë për "shpenzimin e parave që nuk i kemi për Expo 2027". Me fjalimin e tij rreth mbrëmjes, ai merr, siç thotë gazetari i “Nova S”, hapësirë në të gjitha lajmet qendrore, por edhe në programin e mëngjesit ku analizohen ato që thotë.
Propaganda ruse
“Në mediat që ai kontrollon do të shkruhet se sa me fat jemi që kemi një president të tillë. Në mediat e pavarura po mundohen të shohin pasojat e asaj që u tha mbrëmë. Të gjithë presidentët dhe kryeministrat në historinë e afërt apo të përgjithshme të Serbisë nuk e kanë shkelur aq shumë lirinë e medias dhe e kanë kthyer në mjet për vetëpromovim dhe asgjësimin e çdo gjurmë të mendimit të lirë, por të gjithë së bashku nuk kanë pasur kaq shumë fjalime dhe hapësira”, tha gazetari.
Sakaq, një studim i ri ka treguar se si mediat e kontrolluara nga Rusia manipulojnë me sukses formimin e opinioneve në vendet e Evropës Lindore dhe Juglindore, por veçanërisht në Serbi. "Dominimi i medias ruse në pjesën më të madhe të Ballkanit" përbën një kërcënim serioz për sigurinë e Evropës”. Këtë përfundim ka nxjerrë një studim i Fondacionit Friedrich Naumann i publikuar të enjten e kaluar. "Sistemi i klientëve të Putinit, i bazuar në shërbimin sekret, oligarkët besnikë, mediat e kontrolluara dhe një sistem gjyqësor që është në linjë me ta, funksionon si "një plagjiaturë e përsosur në Serbi dhe vendet fqinje”, thuhej në studim. Në Serbi, nën sundimin e presidentit Aleksandër Vuçiç dhe me ndihmën e mediave private që ai kontrollon "me shumë pak përjashtime, mediat më të njohura të vendit përfaqësojnë qëndrimet rusofile dhe demonizojnë SHBA-në, BE-në dhe NATO-n", theksoi ndër të tjera studimi.
