Pas humbjes në transfertën ndaj Atalantës, Parma ka vendosur tē shkarkojë trajnerin Fabio Liverani, i cili ishte ulur në pankinën e emilianëve vetëm pak ditë para startit të sezonit aktual.
Pozita e ish trajnerit të Lecces u trondit që në fundjavë me humbjen në shtëpi ndaj Torinos, por presidenti Krause i dha edhe një shans Liveranit, ndërsa sot vendosi shkarkimin e parakohshëm.
Në pankinë është rikthyer Roberto D’Aversa, njeriu që mori drejtimin e Parmës në Serinë D dhe e solli klubin në elitë brenda tre sezonesh, aty ku e drejtoi me shumë sukses në dy sezone.
D’Aversa u largua pak ditë para fillimit të sezonit, pasi drejtuesit e Parmës e akuzuan se nuk bën lojë tërheqëse, por vijonte të paguhej nga klubi emilian, pasi ka një kontratë të vlefshme deri në verën e 2022-shit.