Dy muaj para se të skadojë marrëdhënia kontraktuale midis Leo Messi dhe Barcelonës, tifozët katalanas janë ende në pritje të vendimit që argjentinasi do të marrë për të ardhmen e tij.
Nga njëra anë, duket se PSG i ka hedhur në tryezë një propozim të pakundërshtueshëm ekonomikisht. Por, nga ana tjetër, Joan Laporta është duke bërë gjithçka për ta mbajtur te Blaugrana-t.
Presidenti i Barçës ka kundërsulmuar zërat që vijnë nga Parisi.
Dje pati një bisedë me babain e Messit, në të cilën, pa një propozim specifik në tryezë, thuhet se janë afruar pozicionet. Laporta nuk do t’i paraqesë një ofertë kapitenit derisa të njohë situatën reale ekonomike të klubit, por disa burime sugjerojnë se argjentinasi, i vetëdijshëm për situatën e vështirë, do të ishte gati ta shkurtonte ndjeshëm pagën e tij në këmbim të një kontrate afatgjatë, që shkon përtej karrierës si futbollist.
Situata me Messin duket se po rigjenerohet pas thyerjes totale në fillim të sezonit, kur sulmuesi dëshironte të largohej nga “Camp Nou”. Nëse ka një futbollist që i njeh ndjenjat e Leo Messit, ai është Xavi Hernández, me të cilin ndau një dhomë zhveshje për 11 sezone. Trajneri aktual i Al Sadd në Katar ka analizuar situatën e argjentinasit në një dokumentar që po përgatitet për “10”, në të cilin Pep Guardiola, Andrés Iniesta, Luis Enrique, Jorge Valdano, Fabio Capello, Ronaldinho, Luis Suárez, Ernesto Valverde, Neymar dhe Xabi Alonso japin mendimin e tyre.
Xavi mendon se Messi ka dashur të largohet nga Barça: “Që Leo nuk është ndjerë i lumtur në atë që unë e konsideroj klubin e jetës më trishton. Është dashur të bëhet shumë keq situata, në mënyrë që ai të mos ndihet i lumtur”.
Ish-mesfushori konsideroi se Barça nuk ka marrë maksimumin nga ai, që për të është futbollisti më i mirë në histori: “Ne duhet të sigurohemi që Leo të jetë i lumtur, sepse me atë të kënaqur kemi më shumë shanse për të fituar tituj. Shumë herë më ka dhënë përshtypjen se Leo nuk ka qenë i lumtur në fushë, se ka qenë i trishtuar. Më vjen keq si katalanas që nuk kemi përfituar sa duhet prej tij në vitet e fundit. Historia dhe ne nuk kemi përfituar sa duhet”.
