Eksperienca e Françesko Morieros në futbollin shqiptar ishte shumë e shkurtër, por me sa duket ka shërbyer që ai të sigurojë telefonata nga futbolli i rëndësishëm.
Ish-sulmuesi italian,drejtoi për disa muaj Dinamon në Kategorinë e Parë e tashmë duket se është gati për të hedhur një hap tjetër para në karrierën e tij si trajner pasi ka marrë një ofertë interesante nga SHBA.
I intervistuar për Euro 2020 nga TMW, Moriero është ngacmuar edhe për të ardhmen e tij si trajner, pas përfundimit të aventurës shqiptare.
“Kam marrë një telefonatë nga Shtetet e Bashkuara të Amerikës. Më pyetën për gatishmërinë për të drejtuar në MLS. Në Itali ka shumë llafe, por ende asgjë konkrete. Të shohim…”, ishte përgjigja e Morieros gjatë intervistës së tij.
