Më shumë se 100 deputetë të Parlamentit Evropian kanë firmosur një letër, të cilën ia kanë dërguar presidentit të Federatës Evropiane të Futbollit, Aleksander Çeferin, duke i kërkuar që kombëtarja e Bjellorusisë, të përjashtohet nga garat eliminatore të Evropianit 2024 në Gjermani.
Sipas ligjvënësve evropianë, pjesëmarrja në garat e UEFA-s e kombëtares bjelloruse, do të përdoret më vonë nga Lukashenko për propaganda.
Deputetët pohuan se lejimi i pjesëmarrjes së Bjellorusisë në këto gara është ofendim i viktimave të agresionit rus në Ukrainë, por edhe për shumë luftëtarë të të drejtave të njeriut në Bjellorusi.
Ndalimi eventual i pjesëmarrjes së Bjellorusisë në eliminatoret për EURO 2024, do të kishte efekt edhe te kombëtarja e Kosovës, e cila gjendet në të njëjtin grup të kualifikimeve me Zvicrën Rumaninë, Izraelinë dhe Andorën.
Për shkak të pamundësisë që të zhvillojë ndeshje në fushën e vet, Bjellorusia ka zgjedhur që disa ndeshje kualifikuese t’i zhvillojë në Serbi.
