PSG u rikthye te suksesi në kampionat duke lënë pas dy humbjet radhazi (Lyon dhe Rennes), me parizienët, të cilët triumfuan 0-2 në “Allianz Riviera” përballë Nice.
Galtier u rikthye në Nice, ish-skuadra e tij dhe në fundin e takimit, tifozët vendas e nxorën të gjithë inatin te trajneri francez, i cili në konferencën për shtyp tregoi se mbeti i habitur.
“Nuk e prisja. Sinqerisht që nuk e prisja.
Mos harroni, Nice është çerekfinalet e Conference League edhe falë punës time, mbi 50% të skuadrës e ndërtova unë, por nuk ka problem.
Pavarësisht kësaj situate, unë nuk dua që kjo të ndikojë te lojtarët e mi. Sa i përket takimit jam i lumtur për rezultatin, fusha tregoi shumë, tregoi se edhe vuajtëm disi, por në fund morëm maksimumin falë cilësive që disponojmë.
Do duhet të punojmë ende, sezoni është i gjatë edhe pse ju mendoni se jemi në hapat e fundit, ndeshja e radhës ka shumë rëndësi për ne.
Ishte një mbrëmje e madhe edhe për Donnarumma-n, ishte fantastik” – tha Galtier.
Sipas informacioneve nga mediet franceze, veprimet e tifozerisë së Nice mund të pasohen me sanksione dhe klubi rrezikon të gjobitet nga 5.000 € deri te mungesa e tifozëve në shkallët e stadiumit dhe Federata Franceze e Futbollit do të njoftojë vendimin më 19 prill.
