Vëllaznimin është kualifikuar në çerekfinale të Digitalb Kupës së Kosovës, pasi e ka mposhtur Besën, pas gjuajtjes së penalltive, ndërsa koha e rregullt dhe vazhdimet dy herë nga 15 minuta përfunduan me barazimin 0:0.
“Kemi pritur ndeshje të vështirë, sepse Besa është skuadër me shumë traditë dhe ka lojtarë cilësorë. Fati ynë ishte që unë i njoh mirë, sepse kam punuar te Besa. Në disa momente Besa ishte më e mirë se ne, por i ndërpremë në pikat e tyre më të forta”, ka thënë Munishi.
Në çastet e fundit ai bëri ndërrim në portën e skuadrës së tij, duke e larguar Altik Muhaxhirin dhe në vend të tij u inkuadrua Alban Gecaj. Ndryshimi doli të jetë i qëlluar, pasi Gecaj e ndali një penallti, ndërsa dy futbollistë të Besës gjuajtën mbi portë.
“Pritja e penalltive është diçka specifike dhe gjatë stërvitjeve unë e kam vërejtur që Gecaj është i mirë në këtë pikë. Sidoqoftë, ishte një fitore e ëmbël që na jep shpresë për një të ardhme me suksese”, ka shtuar Munishi.
