Kumbullat
që ishin në oborret e shtëpive
në lagjen tonë baba
pasi mbiu liria
nga dheu
(ashtu si mbijnë patatet)
i kanë prerë fqinjët
dhe i kanë djegur
gjatë ditëve të ftohta të dimrit
Kur u sosën pemët
disa i braktisën shtëpitë e tyre
dhe shkuan në dhera të huaj
disa vdiqën
Tashti
fantazmat e pemëve lulëzojnë çdo pranverë
dhe unë kur shkojë ndonjëherë rrallë
në vjeshtë
e vjel ndonjë
Pasi të ha ndonjë kumbull
me farat e tyre
gjuaj
në dyert e dritaret e shtëpive të fqinjëve
vetëm atëherë në to u shfaqen
fytyrat e buzëqeshura
të njerëzve
që nuk janë më
