Numri i turistëve nga Kosova në Shqipëri, përgjysmë më i vogël se ai i një viti më parë - Bota Sot
Numri i turistëve nga Kosova në Shqipëri, përgjysmë më i vogël se ai i një viti më parë

Lajme

Numri i turistëve nga Kosova në Shqipëri, përgjysmë më i vogël se ai i një viti më parë

Më: 6 korrik 2020 Në ora: 08:22
Foto Ilustrim

Numri i vizitorëve nga Kosova është përgjysmuar krahasuar me një vit më parë, megjithëse për pushuesit nga ky vend, Shqipëria është destinacioni i vetëm për momentin.

Të dhënat e pikës kufitare Vërmicë-Morinë tregojnë se gjatë muajit qershor 2019, afër 270 mijë qytetarë nga Kosova ishin nisur drejt bregdetit shqiptar, ndërsa gjatë qershorit të këtij viti vetëm 130 mijë.

Pandemia ka ndryshuar destinacionet turistike të kosovarëve këtë vit. Për dallim nga sezonet e kaluara, kur turistët nga Kosova zgjidhnin mes Shqipërisë, Turqisë, Malit të Zi e Kroacisë, tash destinacioni thuajse i vetëm ka mbetur Shqipëria.

Një pjesë e tyre po shfrytëzon fundjavat për pushime, e një pjesë tjetër po pret të vendosë varësisht se si vijojnë rastet e reja me koronavirus. Disa prej tyre preferojnë të shkojnë në Turqi për shkak të sigurisë, e disa po presin që Mali i Zi ta heqë testin për COVID-19, si kriter për të hyrë në këtë shtet. Një pjesë tjetër zgjedh të mos bëjë fare pushime këtë vit.

Megjithatë, fundjava e parë e muajit korrik ka shënuar një rritje të numrit të pushuesve nga Kosova për në Shqipëri. Mëngjesin e së shtunës janë krijuar radhë të gjata automjetesh, ku nga ora 05:00 e mëngjesit deri në orën 07:00 kanë hyrë rreth 8 mijë vetura nga Kosova drejt Shqipërisë.

Shfaq komentet
comments powered by Disqus
Sot mund të lexoni Shfletoni kopertinat