“Besoj se të dielën do të zgjedhet kryetari i ri i shtetit, do të arrihet censusi i nevojshëm dhe do të kemi zgjedhje të pastra si parakusht për shumë punë tjera të cilat e presin shtetin tonë”.
Këtë e theksoi sot kryetari i Komisionit Shtetëror të Zgjedhjeve Oliver Derkoski. Në konferencën që u mbajt në shtypshkronjën “Kiro Dandaro” në Manastir, Derkoski tha se pret që dita e zgjedhjeve të jetë demokratike dhe korrekte.
“E kemi marrë materialin votues dhe e kemi ndarë tek çdo Komision Komunal Zgjedhor. Materiali është punuar në kohë dhe gjatë ditës do të shpërndahet. Fushata për rrethin e dytë ka kaluar në atmosferë të qetë, pa shkelje serioze të procesit, ndërsa për ne e rëndësishme është të kemi zgjedhje demokratike dhe korrekte”, tha Derkoski.
Ndryshe, në listën zgjedhore e cila është përmbyllur më 29 mars të regjistruar janë 1.808.131 votues, ndërsa që të realizohet censusi i nevojshëm duhet të votojnë 723.253 votues.
