Gjatë ditës së djeshme në Maqedoninë e Veriut është mbajtur raundi i dytë i zgjedhjeve për kryetar shteti, në të cilat të drejtën e votës e realizuan 46.70 përqind e qytetarëve të regjistruar në Listën Zgjedhore, ose gjithsej 844.260 qytetarë.
Më shumë vota dje mori kandidati Stevo Pendarovski (436.212 ose 51.66 përqind), i cili edhe do të jetë presidenti i ri i vendit, ndërsa kundërkandidatja e tij Gordana Siljanovska-Davkovka fitoi 377.713 vota ose 44.73 përqind.
Kurse gjithsej 30.437 ose 3.61 përqind fletëvotime ishin të pavlefshme, që është numër i lartë në krahasim me jehonën e qytetarëve.
Fletëvotime të pavlefshme kishte edhe në raundin e parë të zgjedhjeve presidenciale, ndërsa numri përfundimtar arriti deri mbi 32 mijë vota të pavlefshme.
