Ish kryeministri Nikolla Gruevski i cili është në arrati në Hungari, në rrjetin social të tij në ‘Facebook’ shkroi se tashmë ka vendosur të tërhiqet nga posti i deputetit dhe se për këtë vendim do ta njoftojë Kuvendin gjatë ditëve të ardhshme.
Gruevski thotë se nuk do të lejojë që OBRM-PDUKM dhe deputetët e tij për shkak tij dhe mandatit të tij të kenë trysni politike dhe se nuk dëshiron që t’i japë mundësi LSDM-së t’u ikë problemeve që kaplojnë qytetarët dhe të fshihet, siç thotë ai, pas politikave kriminale.
“Vendosa të jap dorëheqje nga posti i deputetit dhe për të njëjtën në mënyrë formale do ta njoftoj Kuvendin gjatë ditëve të ardhshme”, shkruan Gruevski duke falënderuar deputetët e partisë së tij dhe mijëra qytetarë që me mënyra të ndryshme, nëpërmjet kontakteve personale apo nëpërmjet rrjeteve sociale gjatë ditëve të fundit i kanë dhënë mbështetje
Ndryshe më herët Komisioni për çështje të mandatit dhe të imunitetit e miratoi propozimin për marrjen e mandatit të Nikolla Gruevsit. Kjo vjen pasi që ish kryeministri Gruevski mungon më shumë se gjashtë muaj në punën e Kuvendit.
