Mes shumë personazheve të njohur, edhe këngëtarja me famë botërore Rita Ora ka reaguar për ndarjen nga jeta të Mbretëreshës Elisabeth II.
Artistja me origjinë shqiptare ka publikuar një foto të Mbretëreshës në profilin e saj zyrtar në Instagram, ku shkruan e pikëlluar se monarkja 96-vjeçare ishte një frymëzim për të gjithë.
“Mendoj se nuk jam e vetmja me një ndjenjë të madhe humbjeje dhe trishtimi sonte. Mbretëresha ishte një grua e pabesueshme që i dha gjithë jetën vendit të saj. Ajo mbretëroi me një hir, elegancë dhe nder të tillë. Një frymëzim i vërtetë për të gjithë ne. Mendimet dhe lutjet e mia janë me familjen mbretërore në këtë kohë të vështirë dhe të trishtuar. U preftë në paqe”– shkruan Rita Ora.
Harry, Mbreti Charles III, Camilla Parker Bowles dhe Princi William shkuan të gjithë në kështjellën Balmoral pas përkeqësimit të shëndetit të Mbretëreshës, pasi një përfaqësues i familjes mbretërore bëri një deklaratë për gjendjen e saj të enjten në mëngjes.
“Pas vlerësimit të mëtejshëm këtë mëngjes, mjekët e Mbretëreshës janë të shqetësuar për shëndetin e Madhërisë së Saj dhe kanë rekomanduar që ajo të mbetet nën mbikëqyrjen mjekësore. Mbretëresha është në Balmoral”, thuhej në deklaratë.
Disa orë më vonë, familja konfirmoi vdekjen e Mbretëreshës përmes mediave sociale. “Mbretëresha vdiq në Balmoral këtë pasdite”, shkroi në Twitter familja mbretërore.
