David Phillips, Drejtor i Programit për Paqen dhe të Drejtat në Universitetin Columbia, ka thënë se vendimi i Shteteve të Bashkuara të Amerikës për të vendosur sanksione ndaj bosëve të krimit në veri të Kosovës, është në përputhje me premtimin e administratës së Joe Bidenit, për të goditur shkelësit e të drejtave të njeriut dhe korrupsionin.
Ish-diplomati amerikan, ka thënë për gazetën “Bota sot”, se SHBA ka disa instrumente ligjore për të ndëshkuar shkelësit, sikurse Milan Radojiçiq, Zvonko dhe Zarko Veselinoviq, Srdjan Vuloviq, Zeljko dhe Andrija Bojiq dhe Radule Steviq - të gjithë serbë nga Kosova – të cilët që nga dje janë futur në listën e “zezë” të Departamentit të Thesarit të SHBA-së.
“Milan Radojiçiq, Zvonko dhe Zarko Veselinoviq, Srdjan Vuloviq, Zeljko dhe Andrija Bojiq dhe Radule Steviq - të gjithë serbë nga Kosova - janë vendosur në listën e sanksioneve të Departamentit të Thesarit të SHBA-së. Ky veprim është në përputhje me premtimin e administratës Biden për të goditur shkelësit e të drejtave të njeriut dhe korrupsionin. SHBA ka në dispozicion disa instrumente ligjore për të synuar shkelësit. Sekretari i Shtetit i SHBA-së mund të përdorë dispozitën e Seksionit 7031 (c), e cila ndalon hyrjen në Shtetet e Bashkuara të individëve që janë shumë të korruptuar ose si shkelës të egër të te drejtave të njeriut. Kongresi i SHBA autorizoi një kufizim të vizave "përcaktimi publik" sipas seksionit 7031(c) të Aktit të Departamentit të Shtetit, Operacioneve të Jashtme dhe Programeve të Përkatësisht të Ndarjeve, duke filluar me legjislacionin për ndarjet e operacioneve të huaja në VF2008”, është shprehur Phillips për “Bota sot”.
Njoësi i zhvillimeve në rajo ka treguar se sekretari amerikan i Shtetit, autorizoi vendimin për zyrtarët e huaj, pasi për ta ekzistojnë informacione të besueshme që tregojnë se ata kanë qenë të përfshirë në "korrupsion të rëndësishëm". Sipas tij, “lista e zezë” prek edhe anëtarët e familjes së tyre të ngushtë.
“Sipas nenit 7031(c), Sekretari i Shtetit është i autorizuar të ndalojë hyrjen në SHBA për zyrtarët e huaj, për të cilët ekzistojnë informacione të besueshme që tregojnë se ata kanë qenë të përfshirë në "korrupsion të rëndësishëm", duke përfshirë korrupsionin në lidhje me nxjerrjen e burimeve natyrore, ose nëse këta individë janë të përfshirë në “shkeljen e rëndë të te drejtave të njeriut”. Kufizimi i hyrjes zbatohet automatikisht për anëtarët e ngushtë të familjes së individëve të huaj në fjalë”, ka thënë më tej eksperti amerikan.
Ai ka theksuar poashtu se vendimi i djeshëm erdhi si rezultat i konkluzioneve të nxjerra nga Byroja Ndërkombëtare e Narkotikëve dhe Çështjeve të Zbatimit të Ligjit e Departamentit të Shtetit.
“Emërtimi është zakonisht një "përcaktim publik", megjithëse Sekretari i Shtetit mund të zgjedhë ta përdorë atë "privatisht". Është rezultat i një procesi të gjatë ndërinstitucional, me konkluzionet e bëra nga Byroja Ndërkombëtare e Narkotikëve dhe Çështjeve të Zbatimit të Ligjit (INL) e Departamentit të Shtetit. INL është agjencia kryesore që organizon të dhëna nga brenda Departamentit të Shtetit, si dhe nga zbatimi i ligjit, siguria, inteligjenca dhe agjenci të tjera përkatëse nga qeveria federale dhe nivele të tjera të qeverisjes”, ka thënë David Phillips për “Bota sot”.
Ai ka thënë se “turpërimi” publik për përfshirje në korrupsion, dekurajon zyrtarët e huaj. Sipas ekspertit për Ballkanin, ligji në SHBA lejon gjithashtu ngrirjen e aseteve dhe bllokimin e transaksioneve për individët e caktuar.
“Seksioni 7031 (c) është një mjet i fuqishëm, por i pashfrytëzuar i politikës së jashtme të SHBA. Kërcënimi se zyrtarët e huaj mund të caktohen publikisht dhe të turpërohen për përfshirje në korrupsion të konsiderueshëm ose abuzime të te drejtave të njeriut dhe kërcënimi ndaj anëtarëve të familjes për ndalim të hyrjes në SHBA, është një dekurajues ose pengues i fortë për zyrtarët e huaj.
Përveç përcaktimit 7031 (c), Urdhri Ekzekutiv 13818 i 20 dhjetorit 2017, i cili zbatoi Aktin Global të Përgjegjshmërisë për të Drejtat e Njeriut Magnitsky (GMA), është një mjet tjetër për të synuar korrupsionin dhe shkelësit e të drejtave të njeriut. GMA përdor gjuhë të ngjashme me 7031 (c). Megjithatë, E.O. 13818 lejon gjithashtu ngrirjen e aseteve dhe bllokimin e transaksioneve për individët e caktuar”, është shprehur më tej ish-diplomati.
Phillips ka shtuar se vendimi i djeshëm i administratës Biden dërgon sinjal të fortë, për zyrtarët që “gërryejnë demokracinë dhe minojnë sundimin e ligjit”.
“Sanksionimi nuk është bërë në mënyrë joserioze. Ai bazohet në diskutime shteruese ndërinstitucionale. Përcaktimi dërgon një sinjal të fortë përgjegjshmërie. Administrata Biden ka treguar se ka zero tolerancë ndaj abuzuesve të të drejtave të njeriut dhe korrupsionit të institucionalizuar, i cili gërryen demokracinë dhe minon sundimin e ligjit”, ka shtuar për “Bota sot”, David Phillips./Botasot
