Drejtori i Programit për Paqen dhe të Drejtat në Universitetin Columbia, David Phillips, ka folur lidhur me raportimet se Kosova rrezikon të mbetet me 1 milion banorë, nëse vazhdon trendi i ikjes së qytetarëve nga Kosova.
Phillips, në një prononcim për gazetën “Bota sot”, ka thënë se është mungesa e progresit që po shtyn të rinjtë të migrojnë jashtë vendit.
“Të rinjtë e Kosovës duan mundësi. Nëse ka pak vende pune dhe mundësi për avancim, është normale që të rinjtë të kërkojnë të emigrojnë dhe të gjejnë një situatë më të mirë. Mungesa e progresit e ndërton mungesën e shpresës. Të rinjtë nuk duan t'i kalojnë ditët në kafene në pritje të përmirësimit të situatës”, ka deklaruar ish-diplomati amerikan.
Ai për këtë gjendje ka fajësuar Serbinë, për shkak të mosgatishmërisë për një marrëveshje me Kosovën.
“Serbia duhet të fajësohet. Kosova mbetet në harresë për shkak të mosgatishmërisë së Serbisë për të arritur një modus vivendi (marrëveshje që lejon palët në konflikt të bashkëjetojnë në mënyrë paqësore, qoftë për një kohë të pacaktuar ose derisa të arrihet një zgjidhje përfundimtare). Beogradi dhe mbështetësit e tij duhet të paguajnë një çmim për pengimin e tyre”, ka potencuar ish-zyrtari i lartë i Departamentit Amerikan.
Ai ka kritikuar edhe kryeministrin e Kosovës Albin Kurti, duke thënë se ai i ka mbyllur sytë ndaj procesit të dialogut, që sipas tij, duhet të jetë prioriteti kryesor i Kosovës.
“Kryeministri Kurti mezi përmendi dialogun Kosovë-Serbi gjatë udhëtimit të tij në SHBA. A ishte kjo e pakujdesi apo neglizhente? Njohja e ndërsjellë duhet të jetë një prioritet kryesor për qeverinë e Kosovës, por zoti Kurti me sa duket i ka mbyllur sytë ndaj këtij prioriteti. Diçka duhet të ndodhë për të ndryshuar situatën aktuale”, është shprehur Phillips për “Bota sot”.
Ai ka kërkuar nga Bashkimi Evropian, që të marrë vendimin për liberalizimin e vizave për qytetarët e Kosovës. Ndërsa, Qeverisë së Kosovës i ka kërkuar të ndërprejë dialogun me Serbinë, derisa të ndodhë liberalizimi.
“BE-ja duhet të ndërmarrë hapa për të rikthyer besimin në ndërmjetësimin e saj. Liberalizimi i vizave është shumë i vonuar. Nëse nuk ndodh liberalizimi i vizave, mirëbesimi i BE-së do të dëmtohet. Qeveria e Kosovës duhet të pezullojë takimet në Bruksel për dialogun Kosovë-Serbi, derisa të miratohet liberalizimi i vizave. Kufizimi i vizave për zyrtarët e BE-së për të vizituar dhe punuar në Kosovë do t'i bënte presion edhe më shumë Brukselit”, ka thënë David Phillips.
Sipas tij, Qeveria e Kosovës duhet t’i bëjë presion edhe Rusisë, duke i dhënë kohë 24 orë për largim nga vendi diplomatëve rusë, të cilët siç ka thënë Phillips, duhet të trajtohen si spiunë.
"Rusia gjithashtu duhet të jetë nën presion. Rusët që punojnë në misionin e OKB-së nuk janë diplomatë. Ata janë me GRU dhe duhet të trajtohen si spiunë. Qeveria e Kosovës duhet t'u heqë vizat dhe "diplomatëve" rusë t'u jepet 24 orë kohë për t'u larguar nga vendi. Informimi i Brukselit për këtë qëllim, nëse nuk autorizohet liberalizimi i vizave, do të rriste presionin ndaj BE-së, e cila dëshiron të shmangë mosmarrëveshjet që mund të përshkallëzojnë konfliktin”, ka theksuar më tej ai.
“Mjaft është mjaft. Qeveria Kurti duhet të theksojë marrëdhëniet e saj ndërkombëtare në vend që të shikojë nga brenda, gjë që komplikon izolimin dhe kufizon investimet”, ka shtuar për “Bota sot” David Phillips.
Sipas një dokumenti të publikuar nga Autoriteti Qeveritar për Migrim, për periudhën 2018-2020, nga Kosova kanë emigruar 71,799 banorë.
Sipas shifrave të Agjencisë së Statistikave të Kosovës në janar të vitit 2021, popullsia e përgjithshme rezidente në Kosovë ka qenë 1,798,188 banorë./Botasot
