Doktori i marrëdhënieve ndërkombëtare, Gurakuç Kuçi, në një prononcim për gazetën “Bota sot” ka thënë se Serbia me veprimet e saja ndaj Kosovës, po hedh poshtë marrëveshjen e Ohrit.
“Qëndrimi i vendosur i Serbisë përputhet me veprime vendimtare në terren, duke demonstruar refuzimin e saj. Ata pohojnë me guxim kundërshtimin e tyre ndaj integrimit të Kosovës në OKB dhe bëjnë fushatë aktive kundër anëtarësimit të Kosovës në Këshillin për Evropën. Deklaratat e tyre të fundit tregojnë se ata e shohin marrëveshjen e Ohrit thjesht si një kornizë konceptuale, duke hedhur poshtë përmbajtjen e saj. Edhe Jabllanoviq, emnaku i Vuçiqit në Kosovë, i hedh poshtë marrëveshjet e Ohrit dhe Brukselit si të parakohshme dhe të pazbatueshme. Këto direktiva pa kompromis hedhin dyshime se Serbia nuk ka asnjë interes të vazhdojë paqen me Kosovën. Për më tepër, ata e sfidojnë me paturpësi deklaratën për personat e zhdukur, duke mos bashkëpunuar dhe duke rrezikuar vazhdimisht sigurinë në veri të Kosovës përmes strukturave të sigurisë serbe dhe ruse”, shprehet Kuçi.
Sipas tij, dialogu mes Kosovës dhe Serbisë po shkon drejt dështimit, në rast se nuk ndërhyn SHBA dhe BE.
“Pa një angazhim të fortë nga SHBA-ja dhe BE-ja për ta mbajtur Serbinë përgjegjëse, situata vetëm do të përkeqësohet, veçanërisht pasi Perëndimi tërhoqi kërkesën e tij që Serbia të vendoste sanksione ndaj Rusisë. Në mungesë të një presioni të tillë, Serbia do të vazhdojë të përdorë taktika destabilizuese në Ballkanin Perëndimor, duke përfshirë edhe mjetet jopaqësore”, thekson Kuçi.
“Kosova duhet t’i përgjigjet veprimeve të Serbisë me diplomaci të palëkundur, duke kundërshtuar përpjekjet e tyre të gjera propagandistike brenda Kosovës dhe jashtë saj. Vigjilenca është thelbësore, pasi Kosova duhet të aktivizojë të gjitha strukturat e sigurisë për të ekspozuar dhe luftuar propagandën e huaj, e cila në mënyrë tinëzare manifestohet në maskime të ndryshme moderniste”, shpjegon Kuçi për “Bota sot”.
Më tej, ai thotë se Qeveria duhet të marrë hapa të menjëhershëm dhe të tregojë kujdes maksimal, duke mos lënë vend për gabime.
“Ata përballen me një Serbi që gëzon trajtim preferencial nga BE dhe që përfiton nga qëndrimi i “neutralitetit të njëanshëm”. Serbia do të përpiqet të zgjidhë çështjen e Kosovës njëkohësisht në konferencën ndërkombëtare për paqen ndërmjet Rusisë dhe Ukrainës, duke u përafruar me kërkesën eksplicite të Rusisë të bërë para takimit të Brukselit për planin franko-gjerman. Kjo lloj politike duhet ndalur nga Kosova me një bashkëpunim të thellë me SHBA-në dhe Britaninë e Madhe”, përfundon për “Bota sot”, doktori i marrëdhnieve ndërkombëtare, Gurakuç Kuçi.
