Tre policëve të Policisë së Kosovës, të rrëmbyer nga forcat serbe në veri të vendit sot iu shqiptua masa e paraburgimit prej 30 ditësh.
Vendimi u mor nga gjyqtari i procedurës paraprake në Gjykatën e Lartë në Kralevë, pas kërkesës së bërë nga prokurori publik i këtij qyteti në jug të Serbisë.
Këto zhvillime për gazetën “Bota sot”, i komentoi avokati Tomë Gashi.
Ai u shpreh se kidnapimi dhe masa e paraburgimit për policët e Kosovës erdhi si shenjë hakmerrje për arrestimin e kriminelit serb nga Policia e Kosovës.
“Në rastin e kidnapimit apo rrëmbimit të policëve tanë gjykatat në Serbi nuk kanë kurfarë kompetencash ligjore për tu marrë me policët tanë. Qeveria dhe presidenti kriminal i Serbisë, i cili është pasuesi i Millosheviçit këtë veprim e kanë bërë si hakmarrje të arrestimit të një krimineli serb të veriut të Kosovës të cilin vetëm një ditë më herët e arrestoi policia jonë për raste të shumta kriminale duke përfshirë edhe sulmin ndaj KFOR-it.
Pra, kjo çështja e kidnapimit të policëve tanë është hakmarrje për arrestimin e një super krimineli serb dhe një prej udhëheqësëve të bandave paralele të Vuçiqit që veprojnë në Kosovë e që quhen si mbrojtja civile”, shpjegon avokati.
Në fund, Gashi thotë që Vuçiq dërgoi një porosi që nëse arrestohet një serb e njëjta do të ndodhë edhe me të Kosovës.
“Tani, Vuçiq po dërgon porosi se ju e arrestoni një timin ne ju arrestojmë tre nga ju, dhe pasi këtij krimineli serb, Gjykata jonë në Prishtinë ja caktoj masën e praraburgimit prej 30 ditëve, njësoj veproj Gjykata e Serbisë kinse për ta sajuar kidnapimin e policëve si çështje gjyqësore. Pra është thjeshtë hakmarrje për shkak të veprimit të ligjshëm të policisë tonë”, përfundoi avokati Tomë Gashi për “Bota sot”.
