Kryetari i Lidhjes Demokratike të Kosovës, Lumir Abdixhiku, ka paralajmëruar se gjatë ditëve në vijim do të prezantojë planin e partisë së tij për “kapërcimin e krizës së izolimit”.
Sipas tij, Kosova nuk ka qenë kurrë më keq ndërkombëtarisht se sa tani. Ndaj, ai ka thënë se do të ftojë në takim akterë të shoqërisë civile, akademisë, sektorit privat, mërgatës, mediave e opinionistëve, partive politike, shqiptarëve në rajon e miqve të Kosovës nëpër botë “për të ndërtuar rrugën e vërtetë”.
“Prandaj, gjatë ditëve në vijim, do të ftoj akterë të shoqërisë civile, akademisë, sektorit privat, mërgatës, mediave e opinionistëve, partive politike, shqiptarëve në rajon e miqve të Kosovës nëpër botë për të ndërtuar rrugën e vërtetë. Do t’u prezantojë dhe planin e LDK-së për kapërcimin e izolimit e krizës. Në këto takime do të kërkoj mbështetje për ndërtimin e masës kritike e zërit alternativ që bota perëndimore duhet ta dëgjojë nga ne tani. Vendi ynë ka një të ardhme ndryshe nga çfarë na projektohet sot”, ka shkruar i pari i LDK-së në Facebook.
Ndaj kreut të LDK-së, ka reaguar profesori dhe analisti politik Binak Maxharraj
Maxharraj këtë deklaratë të Abdixhikut e quan ‘mrekulli’ dhe plan të bazuar në planin e Isa Mustafës.
“Sikurse krejt opozita e cila e ka digë te pakapërcyshme Albin Kurtin, e jo Aleksandër Vuçiqin si trumbullar i të gjitha të kqiave dhe rrëmujes që po ndodhin në veriun e Kosovës tash e sa vite, kryetari fuqiplotë i Lidhjes Demokratike të Kosovës (LDK), Lumir Abdixhiku për të tejkaluar këtë situatë paralajmëron planin e LDK-së se si të dilet nga kjo situatë në të cilën gjendet veriu i Kosovës. Lumir Abdixhiku si duket në planin e tij të LDK-së, e ka në plan që të fut në jetëveprim Planin e ish-shefit të tij Isa Mustafës rreth Asociacionit me kompetenca ekzekutive të cilën Aleksander Vuçiq po e përmend dhe po e kërkon që disa herë për të qetësuar situatën në veri”, thotë profesori.
Sipas tij, këtij planit të LDK-së do t’i dal tymi pas disa vitesh.
“Ide e mrekullueshme dhe me vend paralajmërimi i këtij Plani sepse posa ky Plan i LDK të hyjë në fuqi situata në veri do të qetësohet sa qel e mshel sytë, nuk do të ketë më protesta, nuk do të sulmohet më policia e Kosovës dhe gazetarët, por edhe nuk do të rrahen dajak shpinës pjesëtarët e KFOR-it. Por këtij Plani të LDK-së do t’i dilte tymi pas disa vitesh kur Lumiri dhe partia e tij nuk do ta shihnin më veriun si pjesë të Kosovës”, thotë tutje ai.
Prandaj, profesori shton se, siç po shihet Lumir Abdixhiku dhe liderët tjerë të opozitës nuk do u shkoj mundi huq, kur dihtet që ata që sa vite më shumë i dolën krah Vuçiqit e jo Albinit.
“Pra, Vuçiq mezi po pret që Lumiri sa më shpejtë të bëjë edhe publik planin e LDK-së që për bazë e ka Planin e Isa Mustafës. Me këtë Plan të LDK-së, pra siç po shihet Kosova do të rehatohet, e cila pas disa viteve do të ecë si pula pa krye”, përfundon profesori Binak Maxharraj.
Ndryshe, Abdixhiku ka thënë se kryeministri Albin Kurti nuk e bën dot Kosovën shtet evropian.
“Ai, grupi i tij ideologjik nga Tirana, analistët e paguar e mediat e pushtetit janë në misionin e tyre ultim të përplasjes përfundimtare të shtetit. Në sinkron, i pari na dërgon drejt përplasjes, të dytit e bëjnë këtë çmenduri të duket bukur. E vërteta është e trishtë”.
“Kosova nuk ka qenë kurrë më keq ndërkombëtarisht se sa sot. Serbia nuk kanë pasur kurrë më shumë përkrahje ndërkombëtare se sa sot. Ata po fitojnë. Ne po humbasim. Kauza e tyre e autonomisë territoriale në Kosovë po merr formë teksa ne mjaftohemi me të drejtën tonë në përballje me gjithë botën”.
“Kosova ka një rrugë të re. Një që e dërgon shoqërinë tonë, gjeneratat e tashme e të ardhme drejt familjes euroatlantike. Një që fiton përballë Serbisë brenda e ndërkombëtarisht pa dallim. Kjo rrugë nuk ka Albin Kurtin në të. Këtë rrugë duhet ta bëjmë ne. Për këtë rrugë na duhet ndihma e të gjithëve. E atyre që besojnë në Republikën, në rrugëtimin euroatlantik e në fundamentet bazike të kësaj shoqërie”, ka përfunduar Abdixhiku.
