Së fundi, Qeveria e Kosovës mori vendim për të zvogëluar praninë e policisë në dhe përreth objekteve komunale në veri të Kosovës, të banuar me shumicë serbe.
Ndonëse, ndërkombëtarët mirëpriten këtë vendim, nga Bashkimi Evropian kërkojnë më tepër.
Zëdhënësi i BE-së, Peter Stano, nuk e vlerëson të mjaftueshëm këtë vendim të qeverisë Kurti, pasi thotë se duhen edhe hapa të tjerë që do të çonin në shtensionimin e mëtejmë të situatës në veri, përfshirë mbajtjen e zgjedhjeve të reja.
Stano tha se për bllokun evropian, si ndërmjetësues i dialogut mes Kosovës dhe Serbisë për normalizimin e raporteve, është shumë e rëndësishme që ky proces të rinisë, në mënyrë që palët të mund të trajtojnë çështje të rëndësishme.
Publicisti Idriz Zeqiraj vlerëson se Kosova ka bërë mjaftueshëm lëshime kur bëhet fjalë për negociatat me Serbinë.
Ai në një bashkëbisedim me “Bota sot” fajësoi Hashim Thaçin për situatën në të cilën ka ardhur dialogu Kosovë-Serbi, ku sipas tij një popull i tërë nuk duhet të dënohet e ndëshkohet, për fajet individuale.
“Kosova ka bërë lëshime të bollshme, madje edhe të dhimbshme. Vetë pranimi i dialogut politikë me Serbinë, pas masakrave masive në Kosovë, është një faj e tradhti nga Hashim Thaçi me ekipin e tij. Duke qenë rrast i shantazhuar, me dosje krimesh, ai pranoi gjithçka që kërkoi Serbia, në këmbim të lirisë personale e grupore, mbi të cilët rëndojnë krimet numerike.
Një popull i tërë nuk mund dhe nuk duhet të dënohet e ndëshkohet, për fajet individuale apo grupore kriminale. Kosova duhet t`i penalizojë nënshkruesit e Marrëveshjes të Asocacionit dhe të tjera, të cilat vënë në pikëpyetje ekzistencën e vet shtetit të Kosovës”, deklaroi ai.
Krahas kësaj, Zeqiraj tha se gjëja e vetme shtesë që duhet bërë nga qeveria Kurti është zhvendosja e kryetarit nga zyra komunale në të cilën ka mbetur i mbyllur tash e sa javë.
“Ndoshta e vetmja shtesë, që mund t`i bëhet de-përshkallëzimit, nga qeveria e Kosovës, është zhvendosja e kryetarit të ngujuar në zyrën komunale, dhe sistemimin e tij në një objekt rrethanor. Por, gjithnjë, me garancinë se në zyrën e të parit të komunës, nuk do të lejohet të hyjë askush, përveç kryetarit fitues në zgjedhjet dhe votën demokratike të pritshme”, theksoi publicisti nga Gjermani.
Më tej, ai potencoi faktin se vendi ynë po pëson humbje nga sanksionet e BE-së, mirëpo ato përballohen më lehtë sipas tij, kur dihet se janë vendosur padrejtësisht.
“Kosova, nën masat sanksionuese, gjithësesi pëson humbje të mëdha. Por, kur dihet, madje botërisht, se këto masa nuk janë për fajin e Kosovës, duhet të përballohen dinjitetshëm. Kosova ka përjetuar terror dhe varfëri, njëherësh. Dhe, ka mbijetuar në saje të solidaritetit ndërnjerëzor. Edhe këto masa do t`i përballojmë, pavarësisht, kohëzgjatjes së tyre.
Për përballimin e lehtësuar të vështirësive aktuale, kërkohet unitet në qendresë. Pikërisht, mungesa e unitetit dhe etja e shfrenuar për pushtet, e një opozite servile e destruktive, kontribuoi shumë në ndëshkimin absurd të Kosovës. Mosbesues në votën e popullit, opozita zgjodhi mbështetjen e Serbisë. Kjo opozitë dje kishte mbështetur -Listën Serbe-, në luftimin e opozitës të saj, sot kjo Listë famëkeqe, po ndihmon në luftimin e pozitës, përkatësisht, të qeverisë aktuale të Kosovës”, nënvizoi ai.
Ndër të tjera, publicisti përmendi edhe lidhjet dhe bashkëpunimet e Listës Serbe me PAN-in, ku më pas edhe u zgjodh kryeministër Ramush Haradinaj.
“PAN-i i lidhur fort me Listën Serbe, në makro-kontrabandën, në vite e dekada, me disa komandantë të inkriminuar, penguan, qëllimshëm, kontaktet me minoritetin serb në veri të Kosovës. Ata e heshtën dhe bllokuan hapjen e Urës së Ibrit, edhe pas ndërtimit të saj, me qëllim që kontrabanda të bëhej shpengueshëm. Krerët e Listës Serbe preferencë kishin PAN-in, në zgjedhjet qendrore. Dhe, këtë e dëshmuan me votën e tyre vendimtare, në zgjedhjen e Ramush Haradinaj kryeministër.
Kosova, pavarësisht marrëdhënieve me Beogradin, me serbët në Kosovë, jug dhe veri, duhet të bashkëpunojë, sepse në mesin e tyre ka shumë Rashiqër e Kërstiçër, të cilët e kuptojnë se bashkëjetesa me shqiptarët, ka qenë dhe mbetet domosdo e kohës. Askush nuk duhet të krenohet, nëse krijon qeverinë pa pjesëmarrjen e serbëve, qofshin ata edhe të Listës Serbe. Komunikimi me serbët duhet të jetë i çiltër, i sinqertë, gjithnjë, në funksion të integrimit e tyre në shoqërinë dhe shtetin e përbashkët-Kosovë”, përfundoi Idriz Zeqiraj për “Bota sot”.
