Mungesa e komunikimit mes studentëve dhe qeverisë, sipas deputetit të Partisë Socialiste, Besnik Bare është e ndikuar nga një instrumentalizim politik.
Deklaratat e deputetit Bare, u bënë në studion televizive të “Ora News”, e cilësoi protestën e studentëve si të shëndetshme për shoqërinë shqiptare, duke i këshilluar këta të fundit që të mos e kompromentojnë lëvizjen e tyre.
“Unë do të doja të kanalizoheshin vetëm tek protesta e studentëve, sepse nëse e lidhim me protesta të tjera, të bën të mendosh se këtu ka një dirigjent politik që i sinkronizon këto dhe nuk është në favorin e studentëve. Unë e konsideroj protestën e studentëve një faktor pozitiv për shëndetin e shoqërisë shqiptare, pavarësisht se jemi ose jo dakord me të gjitha kërkesat e tyre. Për studentët kam këshillë që të mos e komprometojnë lëvizjen e tyre. Të thuash që unë e dua shkollën si gjithë Europa nuk mjafton të veshësh kostumin e kësaj kërkese. Ne duhet të shikojmë thelbin. Në një shkollë që futen 100 dhe dalin 110 nuk është shkollë. Në shkollat çeke që nuk ka tarifë për të studiues futen 140 studentë dhe dalin 43”, – u shpreh ai.
Për të theksuar rëndësinë e një dialogu për zgjidhjen e probleme të ngritura nga ana e studentëve, deputeti i PS solli si shembull rastin e Palestinës dhe Izraelit, të cilët kanë probleme të mëdha mes tyre, por që prapë ulen në bisedime për të sheshuar mosmarrëveshjet.
“Mua më bëri përshtypje një fakt; ndërkohë që palestinezët dhe izraelitët që kanë probleme tejet të rëndësishme pranojnë të ulen dhe të dialogojnë. Bëhet fjalë gjithnjë e më shumë që Beogradi dhe Prishtina të ulen dhe të negociojnë. Karakteri ultimativ i kërkesave për mua tregon qartë që aty ka një faktor politik brenda që përpiqet t’i imponohet studentëve për të mos lejuar komunikimin”, – përfundoi Bare. /ATSH
