Nxënësi i shkollës së mesme Gurkan Ozturk, i cili u shpëtua nga një ndërtesë pesëkatëshe e shembur, në qytetin turk Hatay, 63 orë pas tërmetit, ka regjistruar orët që ka kaluar nën rrënoja, me celularin e tij, raporton Anadolu Agency.
19-vjeçari Ozturk ishte në shtëpinë e gjyshit të tij në Antakya, ku kishte shkuar për të studiuar, në momentin e tërmetit, më 6 shkurt.
Për shkak të një tërmeti të fortë, ndërtesa u shemb, por jo edhe shtëpia e prindërve të tij, ku ndodheshin babai, nëna dhe vëllai.
Ozturk ka regjistruar me telefon momentet e kaluara në hapësirën e vogël që e lejoi të mbijetojë.
Fjalët e para në video, në të cilën i dallohet vetëm dora dhe krahu në një hapësirë të ngushtë të mbuluar me rrënoja, janë: “Më kapi një tërmet. Zoti më ndihmoftë, shpresoj të gjithë të jenë mirë. Nuk dua të vdes i ri”.
“Miq, u bënë gati 40 minuta brenda, mendoj se arrita të bëj një boshllëk ku janë këmbët, gërmova me majë të dorës dhe e mbusha boshllëkun me gurë që të mos shembet. Ndiej ajrin e ftohtë nga poshtë, mendoj se kam bërë një vrimë nëpër të cilën mund të marr oksigjen. Të shohim a mund t’i mbijetojmë këtij tërmeti? Nëse i mbijetoj këtij tërmeti mendoj se do të vlerësoj gjërat në jetë më mirë. Ka ende shumë njerëz për të dashuruar. Ju dua shumë të gjithëve, sidomos mamanë, babin, vëllezërit. Mos keni frikë, shpresoj të mos jeni të mërzitur. Nuk e di çfarë po ndodh atje jashtë, por shpresoj se nuk ka telashe të mëdha. Ndoshta është vetëm diçka me disa ndërtesa të vjetra”, tha Ozturk në momentet kur ndjeu pasgoditjet nën rrënoja.
