Leo Varadkar do të largohet menjëherë nga posti i kreut të partisë dhe do të japë dorëheqje si kryeministër irlandez sapo të zgjidhet pasardhësi i tij në partinë Fine Gael.
Duke njoftuar dorëheqjen, Varadkar e përshkroi kohën e kaluar si kryeministër si “periudhën më të mirë të jetës sime”.
Ai ishte kryeministri më i ri i Irlandës në vitin 2017 kur u bë lider i Fine Gael, raporton bbc.
Ai aktualisht drejton qeverinë e koalicionit në Dublin, së bashku me Fianna Fail dhe Partinë e Gjelbër.
Duke folur nga shkallët e ndërtesave qeveritare në Dublin të mërkurën, Varadkar tha se ai “e kishte udhëhequr Irlandën nga papunësia në punësim të plotë, nga deficiti buxhetor në suficitin buxhetor, nga masat shtrënguese në prosperitet”.
Ai gjithashtu pranoi se “ka fusha ku ne kemi qenë shumë më pak të suksesshëm”. Varadkar tha se arsyet e dorëheqjes ishin “personale dhe politike”.
Ai tha se mendonte se qeveria aktuale “mund të rizgjedhej”, por ai mendon se “nuk ishte më personi më i mirë për këtë detyrë”.
Ndryshe, partitë që udhëheqin qeverinë irlandeze kanë thënë se nuk presin që njoftimi i së mërkurës të shkaktojë zgjedhje të përgjithshme.
