Skuadra boshnjake Bosna Visoko ka pësuar humbje të thellë në Pejë nga kampioni i Kosovës, Besa Famgas, me rezultat 36:18 (14:10), në kuadër të ndeshjes së parë të rrethit të dytë të Kupës së Evropës në hendboll (meshkujt).
Gazeta e njohur në Bosnjë dhe Hercegovinë, “Oslobodjenje”, është e habitur me humbjen e thellë të Bosna Visokos në Kosovë.
“Humbja e thellë e Bosnës nga përfaqësuesi i Kosovës, Prce ishte një nga më të mirët në parket.
Bosna Visoko u mposht me 36:18 në ndeshjen e parë të raundit të dytë kualifikues të Kupës Evropiane nga skuadra e Kosovës Besa Famgas, për të cilën luan lojtari i ynë, Nikola Prce.
Jupa e udhëhoqi Besën drejt fitores me 12 gola ndërsa Alonso Garcia shënoi nëntë, dhe Nikola Prce i ynë e përfundoi ndeshjen me pesë gola.
Te skuadra jonë Bulina ishte më i mirë me pesë gola, ndërsa Osmanhoxhiq dhe Balta realizuan nga tre. Omanoviq dhe Buriq hynë në listën e shënuesve me nga dy gola, dhe Karanoviq, Jamakoviq dhe Sirço realizuan nga 1.
Ndeshja e revanshit do të luhet sot në orën 15.00, gjithashtu në qytetin e Pejës në Kosovë”, shkruan “Oslobodjenje”.
