Mbledhja e Këshillit të Sigurimit të OKB-së ka treguar se ka qenë e nevojshme që të luftojmë që Kosova të jetë në rend ditë, pasi që përfaqësuesit e Prishtinës pësuan debakël.
Kështu ka deklaruar ministri serb i Punëve të Jashtme të Serbisë, Ivica Daçiq.
Ai për RTS ka thënë se mbledhja e Këshillit të Sigurimit të OKB-së ka qenë shumë pozitive, por ka shtuar se nuk duhet të pritet që pas saj situata në Kosovë të përmirësohet automatikisht.
Daçiq ka thënë se anëtaret e Këshillit të Sigurimit njëzëri i kanë dënuar vendimet e Kosovës për vendosjen e taksës ndaj mallrave serbe, kurse shumica edhe formimin e Ushtrisë së Kosovës.
“Të gjithë e kanë dënuar taksën, shumica e kanë dënuar edhe vendimin për formimin e Ushtrisë së Kosovës. Por, për ambasadoren Vlora Çitaku është befasi e madhe kur nga përfaqësuesi i Amerikës dëgjoi se momentalisht duhet të hiqet taksa. Pa marrë parasysh se raporti 10 ndaj pesë në kuptimin se kush e ka pranuar Kosovën, ndodhi që pesë vende që nuk e kanë pranuar Kosovën, përveç tyre Peruja, Bregu i Fildishtë, por edhe Belgjika, të flasin ashpër kundër hapave të autoriteteve kosovare, dhe se përfaqësuesit e Prishtinës kanë reaguar dukshëm të nervozuar”, ka thënë Daçiq.
