Data e afate kohore janë dhënë vazhdimisht për liberalizimin e vizave për qytetarët e Kosovës, por liberalizimi ende nuk është bërë.
BE ka përmendur kushtet që nuk janë përmbushur nga Kosova.
Por, sa ka shanse që të kemi liberalizim të vizave këtë vit?
Zëvendësministri i Integrimeve, Taulant Kryeziu, ka thënë për gazetën “Bota sot” se duhet bërë detyrat e shtëpisë dhe të mos jepen data për liberalizimin e vizave.
“Taulant Kryeziu: Është e pamundur të japim një datë. Të them të drejtën edhe nuk jam fans i datave. Konsideroj se ne duhet të bëjmë detyrat e shtëpisë. Është e qartë se disa shtetet anëtare nuk mendojnë se ne i kemi përfunduar detyrat e shtëpisë, me theks të veçantë në mungesën e rezultateve në luftën kundër korrupsionit të nivelit të lartë dhe krimit të organizuar”, është shprehur ai.
Kryeziu ka thënë se është optimist që gjërat do lëvizin në drejtimin e duhur, derisa këtë vit presidencën e BE-së do ta ketë Kroacia dhe Gjermania.
“Prandaj, që nga dita e parë e qeverisë jemi duke ndërtuar një mjedis politik i cili do të sigurojë ç’kapjen e sistemit të drejtësisë nga politika dhe do të sigurojë frymëmarrje të lirë të organeve ligj-zbatuese në luftimin e kriminalitetit në vendin tonë. Gjatë këtij viti Presidencën e BE-së do ta këtë Kroacia dhe Gjermania. Duke njohur miqësinë e madhe që shteti i Kosovës gëzon me këto dy vende, unë jam optimist që gjërat do lëvizin në drejtimin e duhur”, ka deklaruar Taulant Kryeziu për “Bota sot”.
