Kuvendi i Shqipërisë rrëzon dekretin e Presidentit

Shqipëria

Kuvendi i Shqipërisë rrëzon dekretin e Presidentit

Më: 29 tetor 2020 Në ora: 16:29
Foto Ilustrim

Qëndron formula për koalicionet me listë të pëbashkët.

Ashtu siç kishte paralajmëruar, mazhoranca rrëzoi dekretin e Presidentit Ilir Meta, i cili ktheu për rishqyrtim në Kuvend kodin elektoral. Me 96 vota kundër, shumica la në fuqi ndryshimet e miratuara prej saj në seancën plenare të 5 tetorit.

Me rrëzimin e dekretit të kreut të shtetit, mbetet në fuqi formula e koalicioneve që i grupon partitë politike të dalin në një listë në zgjedhje.

Pak ditë më parë Presidenti Meta argumentoi se ndryshimet e mazhorancës janë të njëanshme dhe cënojnë parimin e procesit të rregullt zgjedhor, si dhe të drejtën e zgjedhësve për të zgjedhur e për t’u zgjedhur.

Kreu i shtetit nuk u mjaftua vetëm me këtë argument, por iu drejtua me një kërkesë për opinion edhe Komisionit të Venecias, kërkesë që nuk u mor parasysh nga mazhoranca, pavarësisht thirrjeve të mbërritura nga Brukseli për të pritur opinionin e “Venecias”. Kryeministri Rama tha se opinioni do të vlejë për zgjedhjet pas 25 Prillit.

Shfaq komentet
comments powered by Disqus
Sot mund të lexoni Shfletoni kopertinat