Armina Mevlani ka përjetuar një fenomen që ndodh gjatë gjumit, i cili është sa i çuditshëm aq edhe i frikshëm. Po flasim për paralizën e gjumit, e cila mund t’ju ndodhë të gjithëve. Nëse e keni përjetuar, e dini ndjesinë e pakëndshme që shkakton ajo.
“Dje përjetova paralizën e gjumit. Ishte e tmerrshme, isha zgjuar, por nuk mund të flisja. E ka provuar dikush tjetër? Më tregoni eksperiencat tuaja”, -ka shkruar Armina në një postim në Instagram Stories.
Por, çfarë është paraliza e gjumit dhe pse ndodh?
Paraliza e gjumit është një fenomen që ndodh në momentin kur na ze gjumi ose kur sapo zgjohemi. Ajo është paaftësia për të lëvizur apo folur ndërkohë që jemi zgjuar. Gjatë paralizës së gjumit, truri ynë është zgjuar, kurse trupi jo. Sipas studimeve paraliza e gjumit prek një pjesë të madhe të njerëzve dhe ata që e kanë përjetuar e tregojnë si një ekperiencë shumë të keqe. Ajo mund të zgjasë nga disa sekonda deri në disa minuta.
Të gjithë mund ta përjetojnë paralizën e gjumit dhe s`ka asgjë të keqe, por nëse ajo bëhet e shpeshtë duhet të kërkohet ndihma e psikologut. Stresi është faktori kryesor që e shkakton atë dhe mund të çojë deri në paralizë të përditshme. Nëse për shumicën e njerëzve kjo është një ekperiencë e frikshme dhe e padëshiruar, disa të tjerë e nxisin paralizën e gjumit në mënyrë që ta kthejnë në një ëndërr të kthjellët, ku kanë kontroll.
Nëse vuani nga paraliza e gjumit mund të bëni disa gjëra, të cilat do t'ju ndihmojnë ta shmangni:
1.Shmangni stimulantët e gjumit.
2.Nuk duhet të shikoni televizor për shumë kohë përpara se të flini.
3.Mos përdorni celularin para gjumit.
4.Shmangni gjumin gjatë ditës.
5.Mos flini me shpinë.
