Mustafa paralajmëron takim me Kurtin rreth mundësive të bashkëqeverisjes - Bota Sot
Mustafa paralajmëron takim me Kurtin rreth mundësive të bashkëqeverisjes

Politika

Mustafa paralajmëron takim me Kurtin rreth mundësive të bashkëqeverisjes

Më: 9 tetor 2019 Në ora: 07:42
Kryetari i Lidhjes Demokratike të Kosovës, Isa Mustafa

Kryetari i Lidhjes Demokratike të Kosovës, Isa Mustafa, paralajmëroi se këto ditë do të takohet me kryetarin e Lëvizjes Vetëvendosje, Albin Kurti, për të diskutuar mundësitë e bashkëqeverisjes.

Në bazë të rezultateve preliminare nga zgjedhjet parlamentare të 6 tetorit, Vetëvendosje ka fituar numrin më të madh të votave, e pasuar me një diferencë të ngushë nga LDK-ja.

Numërimi i votave të rregullta përfundoi të martën, ndërsa votat me kusht, votat me postë dhe votat e personave me nevoja të veçanta nuk janë numëruar ende.

"Në një garë tepër të ngushtë, 50:50, fituesi, LDK apo VV, do të dihet përfundimisht pasi të përfundojë numërimi i plotë i të gjitha votave. Këto ditë, së bashku me kandidaten tonë për kryeministre, Vjosa Osmani, do të takohemi me kryetarin e Lëvizjes Vetëvendosje, Kurti, për të vlerësuar procesin zgjedhor dhe mundësitë e bashkëqeverisjes", shkroi Mustafa në një postim në Facebook.

"Do të vazhdojmë aty ku e kemi lënë para fillimit të procesit zgjedhor, duke respektuar vullnetin e qytetarëve të shprehur me votë të lirë në një proces demokratik zgjedhor, por edhe interesin e LDK-së", tha Mustafa.

Edhe zyrtarë të Vetëvendosjes kanë thënë se do të bisedojnë me LDK-në për mundësinë e marrëveshjes për koalicion.

Në zgjedhjet e 6 tetorit, Partia Demokratike e Kosovës, e cila ka udhëhequr për 12 vjet, ka dalë e treta - gjithnjë sipas rezultateve preliminare të Komisionit Qendror të Zgjedhjeve.

Mustafa tha se qytetarët i "ndëshkuan ata që qeverisën keq".

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...