Ditë më parë është bërë betimi i Qeverisë serbe.
Në betimin e tyre thuhej “Betohem për besnikëri ndaj Republikës së Serbisë, me përgjegjësi dhe përkushtim do të përkushtohem në ruajtjen e Kosovës dhe Metohisë”.
E, ky betim ka nxitur reagime të shumta në Kosovë, që u cilësua si betim për pushtim të Kosovës.
Analisti politik, Faton Mehmeti, në një prononcim për “Bota sot”, ka thënë se, ky betim shpërfaq fytyrën e vërtetë të Serbisë.
“Kjo formë e betimit shpërfaq fytyrën e vërtetë të Serbisë, e cila nuk ka ndryshuar aspak ndaj Kosovës, dhe si e tillë vazhdon fushatën fashiste ndaj saj”, thotë Mehmeti.
Sipas tij, ky betim duhet të dënohet nga BE dhe SHBA, por edhe nga insitucionet e Kosovës.
“Ky betim duhet të dënohet nga BE dhe SHBA, por së pari nga insitucionet e Kosovës, të cilat duhet të tregojnë fytyrën e vërtetë të Serbisë. Me qeverinë aktuale në Serbi, dhe me president Vuçiq, është e pamundur të arrihet një marrëveshje përfundimtare mes Kosovës dhe Serbisë, e aq më pak që Serbia të pranoj njohjen e Kosovës. Në këtë apsekt, qeveria e re e Serbisë vazhdon politikën fashistë ndaj Kosovës, me orekset e saja për territore”, përfundon Mehmeti.
